Millerada
é a parroquia máis extensa de todo o concello de Forcarei.
Nela aparecen importantes obras de cada unha das diversas culturas da
nosa historia.
O Castro das
Rodeiras, no lugar de Garellas, (onde aínda se conservan as defensas de
terra e pedra, e no que apareceron restos das primitivas vivendas) e o
Castro da Mouteira (con foxo e parapeto) son as máis importantes da
Historia Antiga.
A igrexa
parroquial, unha das máis fermosas de toda a bisbarra, garda no seu
interior un retablo barroco do século XVIII, con imaxes de moito mérito.
No cemiterio que a circunda aparece unha escultura do corazón de María
entre columnas salomónicas, obra do canteiro da Terra, Manuel Doval
Cadavid.
Por último,
salientaremos o pazo de Hermosende, de arquitectura señorial, onde naceu
o derradeiro dos Xuíces-Meriños e primeiro alcalde de Forcarei,
Don Alonso de Soto Cortés, e onde se gardou unha das poucas reliquias
documentais que se salvaron da biblioteca do Mosteiro, O "Tumbo
Grande", hoxe depositado no mosteiro de Oseira.
Nesta parroquia tópase
a aldea abandoada de Grovas, encravada cerca dunha gorxa do río do mesmo
nome, nas beiras da serra de Candán. Esta é unha das paisaxes máis
evocadoras e tranquilas da Terra de Montes.
